पोखरा, १६ असार । पोखरामा जारी बृहत् सफाइ अभियान गणेशमानसिंहचोकदेखि गणेशटोल हुँदै सिद्धार्थचोकसम्म सम्पन्न भएको छ । पोखराकै पुरानो बजारका रुपमा प्रख्यात गणेशटोल र रामकृष्ण टोलका झण्डै २ सय ५० वर्ष पहिले निर्मित वास्तुकलायुक्त घरहरु पर्यटकीय दृष्टिले महत्वपूर्ण मानिन्छन् । ‘हप्तामा एक घण्टा ः राष्ट्रका लागि स्वयंसेवा’ भन्ने उद्घोषका साथ संचालित १०९ हप्ताको जनचेतनामूलक सफाइ अभियानमा अष्टे«लियाका स्वयंसेवकको समेत ऐक्यबद्धता जनाएको बटरफ्लाई फाउण्डेसनका अध्यक्ष एवं अग्रज पर्यटन व्यवसायी गोविन्दराज पहारीले जानकारी दिए ।

यसअघि कार्यक्रममा उपस्थित सहभागीलाई वडा ४ का वडा अध्यक्ष शंकर बास्तोलाले सरसफाइ र राष्ट्रिय भावनाको शपथ गराउँदै वडाको सरसफाइमा उत्कृष्ट योगदान दिने सामाजिक संस्थालाई ५० हजारले पुरस्कृत गरिने घोषणा गरेका थिए । कार्यक्रममा कास्की प्रहरी प्रमुख ओमबहादुर रानाले सफाइ अभियानसँगै विकृति विसंगति अन्त्यसँगै सडक सभ्यताका लागि समेत पहल गरिएको खुशी व्यक्त गर्दै सडकमा थुप्रिएका फोहर उठाएर कार्यक्रम शुभारम्भ गरे ।

यसपालिको अभियानमा नेपाल प्रहरी, मुक्तिनाथ विकास बैंक, ओम डेभलपमेन्ट बैंक, एनआईसी एशिया बैंक, अभियान महिला समूह, माछापुच्छे« महिला क्लब, ड्यामसाइड क्लब, मितेरी नारी समूह, शान्तिनगर दिदीबहिनी समूह, सिद्धार्थ क्लब, योग समूह पोखरा ९, स्थानीय आमा समूह, टोल विकास संस्था, सशक्त महिला समूह मासबार लगायत जनप्रतिनिधि र वडाबासीको उल्लेख्य उपस्थिति रहेको अभियान संयोजक रामबहादुर पौडेलले बताएका छन् । कार्यक्रममा वडा ५ का वडा अध्यक्ष धनबहादुर नेपाली समेत उपस्थित थिए ।

अभियानका लागि सामाजिक कार्यकर्ता गोमा सुवेदीले आवश्यक ग्लोब र मास्क उपलब्ध गराएकी थिइन् । कार्यक्रममा विदेशी नागरिकको समेत सहभागिता थियो । ११० हप्ताको सफाइ अभियान वडा १० काजीपोखरीमा हुनेछ ।

पोखरा, १६ असार । पत्रकार विजय नेपाललाई रोट्रयाक्ट पत्रकारिता पुरस्कार प्रदान गरिएको छ । रोेट्रक्याट क्लब अफ पोखराको १७ औं पदस्थापना तथा चार्टर सेरेमनी अवसरमा पत्रकारितामार्फत समाजमा योगदान पु¥याएकोमा रोटरी इन्टरनेशनल डिष्ट्रिक्ट ३२९२ का असिष्टेन्ट गभर्नर रविप्रसाद बरालले नगद सहित सम्मानपत्र प्रदान गरेका हुन् । पुरस्कार राशि ५ हजार ५ सय ५५ रुपैयाँ र सम्मानपत्र रहेको छ ।

क्लबका पूर्व अध्यक्ष सुजन लामिछानेले हजुरबुवा महोदत्त र हजुरआमा देवकी लामिछानेको स्मृतिमा हरेक वर्ष प्रदान गर्ने गरी ‘महोदत्त–देवकी लामिछाने स्मृति रोट्रयाक्ट पत्रकारिता पुरस्कार’ स्थापना गरेका थिए । सोही नामको पुरस्कारबाट गत वर्ष पत्रकार प्रकाश ढकाल सम्मानित भैसकेका छन् । त्यसअघि रोट्रयाक्ट पत्रकारिता सम्मान पत्रकार श्याम कुँवर र दीननाथ बराललाई दिइएको थियो ।

पुरस्कार छनोट समिति संयोजक एवं क्लबका पूर्व अध्यक्ष शोभाकान्त सिग्देलले पुरस्कृत व्यक्तित्वको परिचय गराएका थिए । छनोट समिति सदस्यमा संस्थापक सुजन लामिछाने र क्लबका आइपीपी शिव सुनार थिए । डेढ देशकदेखि पत्रकारितामा निरन्तर क्रियाशील पत्रकार विजय नेपाल हाल राजधानी दैनिकमा पोखरा समाचारदाता र आदर्श समाज दैनिकमा सहायकसम्पादक छन् । उनले यसअघि रासस, रेडियो बाराही, समाधान, पोखरा हटलाइन, संचारदर्पण, राइजिङ पोखरामा पनि काम गरेका थिए ।

गत वर्षमात्रै विन्ध्यवासिनी गीतसंगीत पत्रकारिता सम्मान पाएका पत्रकार नेपाल यसअघि लुक्स पत्रकारिता सम्मान, बाघमारा उत्कृष्ट पत्रकारिता सम्मान लगायत तथा दर्जन बढी संघसंस्थाबाट सम्मानित भएका छन् । सम्मानपछि उनले पत्रकारिता क्षेत्रमा अझ बढी उत्साह र जिम्मेवार थपेको बताए ।

पोखरा १६ असार । समृद्धिका लागी सहकार्य नेपालले वैदेशिक रोजगारमा जाने युवाहरुका लागी दुई दिने अभिमुखीकरण तथा कानुनी सचेतना कार्यक्रम सुरु गरेको छ । कार्यक्रमको उद्घाट गर्दे कास्की नेकपाका नेता दामोदर वैरागीले अभिमुखीकरण कार्यक्रमले विदेश जादा झेल्नु पर्ने दुःख वाट मुतmी पाइने वताउदै प्रशिक्षार्थीलाई विदेश जादा पाइने आफ्ना समस्याहरु प्रष्ठ राख्न अनुरोध गरे ।
कार्यक्रमका विशेष अतिथी पोखरा २४ का वडा अध्यक्ष ओम प्रसाद सुवेदीले अव रोजगारको शिल सिलामा विदेश जादा कसैले पनि असुरक्षीत महसुस नगरुन् भन्दै कार्यक्रमको सफलताको शुभकामना व्यतm गरे ।

पोखरा महानगरपालीकाको सहयोग रहेको कार्यक्रममा पोखरा महानगर पालीकाका २४ र १८ का युवाहरु सहभागी भएका छन् ।
समृद्धिका लागी सहकार्य नेपालले महिला दलित कृर्षि र कानुनी सेवावारे विभीन्न कार्यक्रम गर्दे आइरहेको संस्थाका उपाध्यक्ष वोधराज सुेवेदीले जानकारी दिए । सस्थाले अव अन्य जिल्लामा पनि आफ्नो कार्यक्षेत्र विस्तार गर्ने लक्ष्य रहेको संस्थाका अध्क्षय सन्तु सुवेदिले वताइन् ।

पोखरा, १६ असार । पोखराको विशेष साहित्यिक अभियान अक्षरयात्राको १ सय ५५ औं शृंखला काहुँखोला पुगेको छ । गजल सन्ध्या पोखरा र नवनीत साहित्य सागरले महिनाको तेस्रो शनिबार गर्दै आएको अक्षरयात्राको यो शृंखला जनकल्याण समिति काहुँखोलाको समन्वयमा भएको हो ।‘जीवन र जगतको यथार्थवोधका लागि अक्षरयात्रा’ भन्ने मूल नारासहित हुँदै आएको अक्षरयात्रामा झन्डै दुई दर्जन स्रष्टाले सिर्जना वाचन गरे । साहित्यिक पर्यटनको अवधारणालाई आत्मसाथ गर्दै देशका विभिन्न ठाउँमा अक्षरयात्रा हँुदै आएको छ । अक्षरयात्रीले असारसँग सम्बन्धित कविता सुनाए । प्रेम र समसमायिक सिर्जनाले जनकल्याण समितिको सभाहल रोमाञ्चक बन्यो । यात्रीहरुले कवितामार्फत किसान र गाउँका सिर्जना सुनाए ।

बढ्दो जनसंख्या र पूर्वाधारले पोखरा अस्तव्यस्त भइसकेको भन्दै काहुँखोलालाई जोगाउन कविहरुले आह्वान गरे । अक्षरयात्राका परिकल्पनाकारमध्येका एक प्रकट पगेनी ‘शिव’ले जनकल्याण समितिले सामाजिक काम गर्दै आएको भन्दै काहुँखोलालाई बचाउन पनि नेतृत्व लिन आग्रह गरे । जनकल्याण समितिका पूर्व अध्यक्ष तथा सल्लाहकार लोकबहादुर कार्कीले यसअघि पनि ३ पटकसम्म अक्षरयात्राका लागि सहकार्य गरिएको र आगामी दिनमा पनि अक्षरयात्रासँग हातेमालो गर्ने बताए ।अक्षरयात्रामा रुपिन्द्र प्रभावी, कपिल शर्मा, हेमन्त हितैसी, सौगात पोखरेल, शंकर ज्ञवाली, प्राञ्जल, युवराज त्रिपाठी, सुदर्शन पौडेल, धर्मराज पौडेल, लक्ष्मी भट्टराई लगायतले सिर्जना वाचन गरे । सोही अक्षरयाकै अवसरमा संस्थाका सदस्य तथा पदाधिकारीका लागि लेख तथा रचना लेखन कक्षा पनि समितिले सञ्चालन गरेको छ । कवि प्रकट पगेनी र रुपिन्द्र प्रभावीले लेखन सम्बन्धी अनुभव र अनुभूति साटे । लेख रचना लेख्दा विषय केन्द्रितका विषयमा प्रभावी र पगेनीले अनुभव सुनाए ।

सन्ध्याका अध्यक्ष अमृत सुवेदीले साहित्य र पर्यटनलाई जोडेर जीवन र जगतलाई नजिकबाट बुझेर साहित्यको श्रीवृद्धि गर्ने काम अक्षरयात्राले गर्दै आएको बताए । अक्षरयात्रा एउटा साहित्यिक अभियान रहेको र यो निरन्तर चल्ने भनाइ राखे । नवनीत साहित्य सागरका अध्यक्ष लक्ष्मण थापाले जनकल्याण समितिले निरन्तर सहकार्य गरेको र आगामी दिनमा पनि निरन्तर रहने विश्वास व्यक्त गरे ।
जनकल्याण समितिका अध्यक्ष देवराज बरालले २०४९ सालमा स्थापना भएको समितिले सामाजिक क्षेत्र निरन्तरण क्रियाशील हुँदै समाजको अगुवाई गरेको बताए ।

अक्षरयात्राकै मेसोमा लेख तथा रचना कक्षा पनि सञ्चालन गरेर संस्थाका सदस्य तथा पदाधिकारीको पनि लेखन अभिवृद्धिको प्रयास गरिएको उनको भनाइ थियो । समितिका युवा समिति संयोजक विनोद आचार्यले लेखन कक्षाले सिजर्नाकर्ममा अभिप्रेरित गरेको बताए । सन्ध्याका सचिव वसन्त विनोदले अक्षरयात्राको सहकार्यका लागि समितिलाई धन्यवाद दिए । समितिका महासचिव कुमार केसीले संस्थाले समाजका हरेक क्षेत्रमा आफ्नो क्रियाशिलता बढाउँदै लगेको बताए ।

पोखरा, १६ असार । सानिमा लाइफ इन्स्योरेन्स कम्पनी लिमिटेडले पोखराको न्युरोडमा १८ आंै शाखा स्थापना गरेको छ । शाखाको प्रदेश नं. ४ का प्रदेश सांसद विन्दुकुमार थापा, कलाकार एवं कम्पनीमा सद्भावना दुत जितु नेपाल र कम्पनीका मुख्य व्यवस्थापक गणेश चौलागाईले शुक्रबार संयुक्त रुपमा उद्धघाटन गरेका हुन् । कार्यक्रममा बोल्दै सांसद थापाले जीवन रक्षा एवं स्वास्थ्य प्रवद्र्धनका खातिर बिमा आवश्यक रहेको बताए । बिमा गर्ने र बिमा प्राप्त गर्ने प्रक्रियालाई सरल र सहज बनाउनु आवाश्यक रहेको उनले तर्क गरे । प्रदेश नं ४ का बासिन्दाको लागि बिमा अनिवार्य गराउने कार्यक्रम ल्याउन आफ्नो पहल रहने धारणा राखे ।

सानिमा लाइफ इन्स्योरेन्सका सद्भावना दुत हास्य कलाकार जितु नेपाल मुन्द्रेले स्थापनाको छोटो समयमा नै आम जनसमुदायको विश्वास जित्न सफल भएको बताउँदै ढुक्क भएर सानिमामा बिमा गर्न समेत उनले आग्रह गरे । पोखरा उद्योग वाणिज्य संघका अध्यक्ष विश्व शंकर पालिखेले उद्योगी व्यवसायीको लागि जीवन बिमा अनिवार्य गर्नको लागि आफूले पहल गरेको बताए । नेपाल पत्रकार महासंघ कास्कीका अध्यक्ष दीपेन्द्र श्रेष्ठले समुदायमा बिमा साक्षरताको आवश्यकता औेल्याउदै साक्षरता फैल्याउन पत्रकार महासंघ तयार रहेको बताए ।

कार्यक्रममा सानिमा बैंकका क्षेत्रीय प्रवन्धक भावुक तण्डुकार, निम्स पोखराका अध्यक्ष केशव ढकाल, निबर्तमान अध्यक्ष सुनयना पालिखे, सिटी रेवानका निबर्तमान अध्यक्ष केपी शर्मा, सानिमा बैंकको बिरौटा शाखा प्रमुख हरिप्रसाद अर्याल, मेगा बैंकका प्रवन्धक ख्याम नारायण काफ्ले, लायन्स क्लब अफ डिष्ट्रिक्ट ३२५ बि १ नेपालका रिजन चियर पर्सन मोतीराज तिमिल्सेना लगायतले बोलेका थिए ।
सानिमा बैंक तथा राष्ट्रिय अन्तर्राष्ट्रिय स्तरमा व्यावसायिक अनुभव हासिल गरेका प्रतिष्ठित गैरआवासीय नेपालीद्वारा कम्पनीको प्रवद्र्धन गरिएको छ । कम्पनीले हालसम्म सानिमा सरल, सानिमा दीर्घायु, सानिमा धनपति, सानिमा बालसौगात र सानिमा म्यादी गरी पाँच योजनाहरु बजारमा ल्याएको शाखा प्रमुख सुदिपराज ढुंगानाले जानकारी दिए ।

सानिमा इन्स्योरेन्सका प्रमुख व्यवस्थापक गणेश चौलागाईंको अध्यक्षतामा भएको कार्यक्रममा स्वागत संस्थाका बजार प्रमुख मिना जि.सी कँडेल र संचालन शाखा प्रमुख सुदिपराज ढुंगानाले गरेका थिए । हाल कम्पनीको अधिकृत पूँजी ३ अर्ब रुपैयाँ, जारी पूँजी २ अर्ब रुपैयाँ तथा चुक्ता पूँजी १ अर्ब ४० करोड रुपैयाँ छ । छिट्टै ६० करोड रुपैयाँ बराबरको शेयर निश्कासन गर्ने तयारी गरिरहेको छ ।
थोरै संख्यामा मात्र जीवन बिमा भएकाले नेपालमा बिमाको बजार व्यापाक राम्रो रहेको चौलागाईंले बताए । प्रदेश ४ अन्तर्गतका विभिन्न जिल्लाहरुमा शाखा स्थापनाको तयारी भइरहेको उनले जानकारी दिए । उत्कृष्ट काम गर्ने ८ जना एजेन्सी म्यानेजरहरुलाई सोही अवसरममा सम्मान समेत गरिएको छ ।

पोखरा, १६ असार।नेपाल पर्यटन पत्रकार संघ प्रदेश नं. ४ को प्रथम अधिवेशनबाट अध्यक्षमा हरि बाँस्तोला (कास्की) सर्वसम्मत चयन हुनुभएको छ । शुक्रबार पोखरा भएको अधिवेशनबाट वरिष्ठ उपाध्यक्षमा गोविन्द सुवेदी (कास्की), महिला उपाध्यक्षमा जमुना शर्मा ‘वर्षा’ (कास्की), महासचिवमा घनश्याम पाण्डे (कास्की), सचिवमा विजय राना (बागलुङ), समावेशी सचिवमा कमला राना (नवलपरासी) र कोषाध्यक्षमा रोहित बस्नेत चयन हुनुभएको छ ।

त्यसैगरी, सदस्यहरूमा सन्तोष गौतम (म्याग्दी), राजन उपाध्याय (तनहुँ), सुशील सुवेदी (स्याङ्जा), रत्ना गुरुङ (कास्की), रोहितराज पराजुली (कास्की) र भूपाल गुरुङ (कास्की) रहनुभएको छ । यसअघि, अधिवेशनको उद्घाटन गर्दै संघका केन्द्रीय अध्यक्ष धनीराम शर्माले बिट पत्रकारितालाई स्थापित गर्ने उद्देश्यले संघको स्थापना भएको स्पष्ट पार्नुभयो । विषय विज्ञता र बिटका आधारमा नेपाली पत्रकारिता क्षेत्रले अझै फड्को मार्न सक्ने भन्दै अध्यक्ष शर्माले प्रदेश नं. ४ पर्यटनको प्रमुख गन्तव्य भएको र पर्यटन पत्रकारिताको समेत राम्रो सम्भावना भएको उल्लेख गर्नुभयो ।

नेपाल पत्रकार महासंघ प्रदेश नं. ४ का अध्यक्ष त्रिभुवन पौडेलले बिट पत्रकारिता गरिरहेका पत्रकारहरू संगठित हुनु सकारात्मक भएको भन्दै यस्ता संघसंगठनले नेपाली पत्रकारितालाई अझै बलियो बनाउने विश्वास व्यक्त गर्नुभयो । नेपाल आदिवासी जनजाति पत्रकार महासंघ (फोनिज) कास्की शाखाका अध्यक्ष एमबी आस्था मगरले पर्यटन क्षेत्रको विकासमा पत्रकारिता क्षेत्रले ठूलो टेवा दिन सक्ने भन्दै पर्यटन क्षेत्रको प्रवद्र्धनका लागि संघले अग्रणी भूमिका खेल्ने अपेक्षा राख्नुभयो । नेपाल पर्यटन पत्रकार संघ प्रदेश नं. ४ का तदर्थ समितिका अध्यक्ष हरि बाँस्तोलाको अध्यक्षतामा भएको कार्यक्रमको सञ्चालन महासचिव घनश्याम पाण्डेले गर्नुभएको थियो ।

पोखरा, १५ असार । पोखरामा टिभिइटी करियर फेयर २०१८ शुरु भएको छ । एस ई ई उर्तीण भएका विद्यार्थी, प्राविधिक शिक्षा लिन इच्छुक व्यक्ति, रोजगारीका लागि सीपमूलक तालिम लिन खोज्ने व्यक्तिहरुलाई लक्षित गरी करियर फेयर आयोजना गरिएको हो । कार्यक्रमका प्रमुख अतिथि प्रदेश नं. ४ की सामाजिक विकास मन्त्री नरदेवी पुनले शिक्षा समसामयिक नभएको बताउनुभयो । वहाँले सरकारले प्राविधिक शिक्षामा जोड दिएको बताउनुभयो । ४ नं. प्रदेशमा हाइड्रो, पर्यटन, कृषि र पूर्वाधार निर्माणलाई जोड दिएको वहाँको भनाई थियो ।

सांसद राजीव पहारीले मुलुक संघीयतामा गए पनि एकात्मक सोच हट्न नसकेको बताउनुभयो । समृद्ध नेपाल बनाउनका लागि प्राविधिक शिक्षामा उल्लेख्य लगानी गर्नुपर्ने बताउनुभयो । कार्यक्रमका अध्यक्ष तथा प्राविधिक शिक्षा तथा व्यवसायिक तालिम परिषद(सिटिईभिटी)का सदस्य सचिव पुष्परमण वाग्लेले देशको आवश्यकता अनुसारको जनशक्ति उत्पादनमा ध्यान दिनुपर्ने, उपलब्ध प्राकृतिक श्रोत साधनको अधिकत्तम उपयोग गरेर उत्पादकत्व बढाउन आवश्यक रहेको बताउनुभयो ।

करिव १५०० को सहभागिता रहेको कार्यक्रममा पिसिएल तह अन्तर्गत नर्सिङ, हेल्थ असिस्टेन्ट, ल्याव टेक्नोलोजी, रेडियोग्राफी, अपथाल्मिक साइन्स, डेन्टल साइन्सको बारेमा जानकारी दिइएको थियो । त्यस्तै टिएसएलसी कुलीनरी आर्टस, होटल म्यानेजमेन्ट, सिएमए, एएनएम, जेटिए, सव–ओभरसियर तथा डिप्लोमा फार्मेसी, सिभिल इन्जिनियर, कम्प्युटर इन्जिनियरिङ, होटल म्यानेजमेन्टका विषयमा जानकारी गराइएको थियो । सूचना तथा अनुसन्धान महाशाखा, सक्षमता परियोजना, पोखरा प्राविधिक शिक्षालय, रानीपौवा, दीगो तथा सम्मानित रोजगारीका लागि सीप परियोजना, प्राविधिक शिक्षा तथा व्यवसायिक तालिम परिषद(सिटिईभिटी)को आयोजनामा कार्यक्रम गरिएको हो ।

पोखरा, १५ असार । बालबालिकाको शिक्षाको जग बलियो बनाउन सकेमा मात्र आफ्ना बालबालिकाको भविष्य उज्जवल हुने कुरा अधिकांश अभिभावकहरुको बुझाई सार्थक भएको छ । यस्तो बुझाई इजिआरपी कार्यक्रमले ल्याएको भन्ने ठम्याई छ । कक्षा १, २ र ३ का बालबालिकाको पठन सिप विकास गर्ने उद्देश्यले युएसएआईडिको आर्थिक तथा प्राविधिक सहयोग र जिल्ला नेपाल सरकार शिक्षा मन्त्रालयद्धारा सञ्चालित राष्ट्रिय प्रारम्भिक कक्षा पढाई कार्यक्रम कास्की लगायत १६ जिल्लाका बालबालिकाका लागि समुदाय स्तरमा सञ्चालन गरिएको हो ।

दुई वर्षसम्म सञ्चालन गरिएको कार्यक्रम फेज आउट हुनै लाग्दा अन्तिम दिन कास्की जिल्लामा विहिवार गरिएको जिल्ला स्तरिय परियोजना प्रगती समिक्षा तथा अन्तरक्रिया कार्यक्रममा बोल्ने अधिकांश वक्ता यो कार्यक्रम निकै प्रभावकारी र सोचेभन्दा धेरै राम्रो भएको अनुभव सुनाएका हुन् । यस कार्यक्रमले वर्षोदेखि विद्यालयमा पढाउँदै आएको शिक्षण पद्धतीलाई तोड्दै शैक्षिक सामाग्रीको प्रयोगले बालकेन्द्रित सिकाई, पठनसिपको विकास, पढाईमा दिगोपन, पढाईप्रति जारुकता र विद्यार्थीहरुमा पढाईको द्रुतता बढेको वक्ताहरुको विश्वास छ । यसले बालबालिकामा शैक्षिक मात्र नभएर बाह्य ज्ञानको पनि विकास भएको र समुदायमा पनि चेतनाको स्तर वृद्धि भएको भन्दै अव यसलाई निरन्तरता दिन आवश्यक रहेको उनीहको ठम्याई छ ।

कार्यक्रममा बोल्दै कार्यक्रमका प्रमुख अतिथी जिल्ला शिक्षा विकास तथा समन्वय इकाई समिती कास्कीका उपसचिव नवराज पौडेलले राष्ट्रिय प्रारम्भिक कक्षा कार्यक्रम सुरुवाती अग्रता भएको बताउँदै यसले सबैमा उत्साह थपेको बताए ।जहाँ ओनरसिप, लिडरसीप र डेलिगेशनलाई कसैले भुल्न नहुने बताए । उनले कार्यक्रम फेज आउट भएकोमा कुनै चिन्ता मान्नु नपर्ने बताउँदै सबैले आफु जहाँ छु, त्यहिबाट सुरुवात गर्ने, जे छ, त्यति प्रयोग गर्ने र जे सकिन्छ त्यहि गर्ने हो भने प्रारम्भिक कक्षा पढाई कार्यक्रमलाई निरन्तरता दिन कुनै समस्या नआउँने उल्लेख गरे ।

उनले आफुमा भएको सिर्जनशिलता गुमाउन नहुने भन्दै अपनत्व जोगाउन लागि पर्नुपर्ने बताए । साथै उनले दुइृ वर्षे कार्यक्रम फेज आउट भए पनि यसको प्रभावकारीतालाई बुझेर आफैले निरन्तरता दिन विद्यालय र समुदाय लागि पर्नुपर्ने बताउँदै यसका लागि आफुले सक्दो पहल गर्ने बताए । राष्ट्रिय प्रारम्भिक कक्षा पढाई कार्यक्रम अन्तर्गत कास्कीमा समुदाय परिचालनको जिम्मा पाएको बाल हितकारी परियोजना नेपालका अध्यक्ष गोविन्द पहारीले यस कार्यक्रमले बालबालिकाको पठन सिपलाई अझै उत्तरदायी बनाउँदै लगेकोको यसको निरन्तरताको खाँचो औल्याए ।

माछापुच्छ्रे गाउँपालिकाका शिक्षा विभाग प्रमुख लोकनाथ आचार्यले यस कार्यक्रमले समुदायमा शिक्षाप्रतिको जागरण बढेको र विद्यालय र समुदायविच अन्यानोश्रित सम्वन्ध अगाडी बढेको बताए । कार्यक्रमले विद्यार्थीहरु पढाईप्रति उत्सुक भएको र समुह कार्य गर्न प्रेरित गरेको उनको भनाई छ ।मादी गाउँपालिका वडा नम्वर ८ की सदस्य लालदेवी घलेले यो कार्यक्रम प्रभावकारी भएको भन्दै निरन्तरताको लागि वडामा यस कार्यक्रमको लागि छुट्टै योजना माग गरेको बताईन् ।

कार्यक्रममा पोखरा २५ की सीता थापाले यो कार्यक्रमले बालबच्चा मात्र नभएर फुर्सद भएका आमाहरुले पनि टोल पढाई समुहमा गएर साक्षर बनेको गर्भिलो भनाई राखिन् ।कार्यक्रममा कालिका माविका प्राचार्य बलराम गिरी, नविन माविका शिक्षक दिपक पौडेल, महेन्द्र मावि भलामका शिक्षक बलराम पौडेल, टोल पढाई समुहकी कमला परियार लगायत अन्य शिक्षक अभिभावक तथा टोल पढाई समुहका संयोजकले बोल्दै यस कार्यक्रमले ग्रामिण स्तरका, विपन्न तथा दलित बालबालिकालाई पनि पढाईमा जागरुक बनाएको र जग बसाएको भन्दै यसको निरन्तरताको खाँचो औल्याए ।

जसका लागि आफुहरुले पनि पहल गर्ने र स्थानिय सरकार तथा जनप्रतिनिधीले पनि सहयोग गरिदिन आग्रह गरे ।ईजिआरपी कार्यक्रम कास्कीका २२ स्रोत केन्द्र अन्तर्गतका विद्यालयमा यो कार्यक्रम लागु भएको हो । यस कार्यक्रमले कास्की जिल्लाका ३ सय ८३ विद्यालयका १ देखि ३ कक्षा सम्म अध्ययनरत करिव १४ हजार विद्यार्थी लाभान्वित भएका छन् ।यीमध्ये १ सय ७ विद्यालयले विद्यालय व्यवस्थापन अनुदान समेत पाएका थिए । यो कार्यक्रम अन्र्तगत टोल टोलमा पढाइ समुह गठन गरिएको छ । त्यस्ता टोल समुह ६ सय ८६ रहेका छन् ।

पोखरा । पोखरा लेखनाथ ८ सिमलचौरमा रहेको पिसजोन एकेडेमीमा विद्यार्थीहरुको बिहीबार निःशुल्क दन्तपरीक्षण गरिएको छ । एक दिन वृत्तचित्रसहित दाँतको सुरक्षाका बारेमा जानकारी दिएर अर्को दिन दन्त परीक्षण गरिएको विद्यालयका संस्थापक तथा प्रमुख व्यवस्थापक योगेन्द्र शर्मा दाहालले जानकारी दिए । डाक्टर टुथ डेन्टल केयर प्रा.लि.को प्राविधिक सहयोग र विद्यालयको सहकार्यमा भएको निःशुल्क दन्त परीक्षणमा कक्षा ३ देखि १० सम्मका सम्पूर्ण विद्यार्थीहरुको दन्तपरीक्षण गरिएको थियो । त्यसैगरी विद्यालयका शिक्षक कर्मचारीहरुको पनि दन्त परीक्षण गरिएको डाक्टर टुथ डेन्टल केयर प्रालिका डा. शुशिल पोख्रेलले जानकारी दिए ।

प्रशिक्षण तथा परीक्षणमा डा.विमल पन्थी, डा. शुशिल पोख्रेल लगयातको टोलीलले निःशुल्क परीक्षण एवम् प्रशिक्षण दिएका थिए । दन्त शिविर एवम् प्रशिक्षणका क्रममा दाँतको कसरी हेरचाह गर्ने, कस्ता खाने कुरा खाने, कति समयमा नियमित दाँतको जाँच गराउने,कसरी बिग्रिएका दाँतहरु मिलाउने, कस्ता टुथ पेस्ट, ब्रसको प्रयोग गर्ने बारेमा वृत्तचित्रसहित जानकारी दिइएको थियो । विद्यालयले विद्यार्थीलाई सैद्धान्तिक ज्ञानबाहेक पनि व्यक्तिगत र शारीरिक सुरक्षासँग यस्ता खालका स्वास्थ्यबद्र्धक कार्यक्रमहरुलाई नियमित रुपमा गर्दै लैजाने विद्यालयका संस्थापक तथा प्रमुख व्यवस्थापक योगेन्द्र शर्मा दाहालले जानकारी दिए ।

पोखरा । लागु औषध वेच विखन तथा ओसारपसार विरुद्ध दिवसको अवसरमा पोखरा १७ सितापाईलामा अवस्थित नौलो घुम्ती नेपालको परामर्श, उपचार तथा पुनःस्थापना केन्द्रमा सामुहिक जन्मोत्सव मनाएका छन् । कार्यक्रमका प्रमुख अतिथि पोखरा लेखनाथ महानगरपालिका वडा नं. १७ का वडा अध्यक्ष तिर्थराज अधिकारीले उद्धाटन गर्दै वडा नं. १७ लाई लागु औंषध मुक्त वडा वनाउन संघसंस्थाहरु संगै मिलेर कार्य गर्ने वताए ।

उनले त्यसको प्रारम्भिक कार्य अन्र्तगत समिति बनाइ सकिएको र लागु औषध प्रयोग कर्ताको उपचारमा कार्य गरिरहेका संघसंस्थाहरुसंग सुझाव संकलन कार्यलाई तिव्र पारिएको बताए । सो अवसरमा कैलालीका राम रजक, वुटबलका अमृत खड्का, पर्सा, विरगंजका श्याम लामा, कास्कीका अमृता रसाईली, लोकराज अधिकारी, सुभाष कडेंल लगाएतले कुनै समय लागू पदार्थको लतमा लागेर जीवन बर्बाद हुन लागेको समयमा नौलो घुम्ती नेपालले पुनर्जीवन दिएको बताएका थिए ।

नौलो घुम्ती नेपालका अध्यक्ष खड्गबहादुर रानाभाटले पुनःस्थापना केन्द्रबाट रिकभरीहरुको पुनस्थापित जिवनको दिगोपनालाई निरन्तरता दिनकोलागि उत्प्रेरणा दिने कार्यक्रमको उद्धेश्य रहेको वताए । साथै उनले समाजमा अर्थपुर्ण, गुणस्तरिय जिवनयापन गरिरहेकाहरुलाई सम्मान गर्न, लागु औंषध प्रयोगकर्ताहरुलाई हौसला तथा प्रेरणा प्रदान गर्दै लागु औंषध प्रयोग कर्ताहरुको उपचार सम्भव छ भन्ने कुरा समाजमा फैलाउन पनि कार्यक्रमले सहयोग पु¥याउने वताए।

नौलो घुम्ती नेपालका अध्यक्ष खड्गबहादुर रानाभाटको अध्यक्षतामा भएको कार्यक्रममा परामर्श, उपचार तथा पुनस्थापना केन्द्रकी कार्यक्रम संयोजक मना ज्ञवालीले स्वागत र कार्यक्रम संचालन परामर्शदाता केशवराम श्रेष्ठले गरेका थिए ।