विराटनगर‐ १३ असोज ।गण्डकी प्रदेशका अन्तर प्रदेश भ्रमण टोली प्रदेश नं एक पुगेको छ । टोलीले सोमबार विराटनगर पुगेर प्रदेश मुख्यमन्त्री शेरधन राईको टोलीसंग दुई प्रदेशको पर्यटन प्रर्वद्धन र सहकार्य विषयमा अन्तरक्रिया सम्पन्न गरेको छ ।विराटनगरका विभिन्न उद्योगी व्यावसायी सहितको अन्तरक्रियामा बोल्दै मुख्यमन्त्री राईले आफ्नो प्रदेशले पोखरा विराटनगर सिधा हवाई सेवा सुरुवात गर्न चाहेको बताए । दुवै प्रदेश पर्यटनको प्रचुर संभावना भएको प्रदेश भएकाले हवाई सेवाको माध्यामबाट पर्यटक अदान प्रदानमा सहयोगी हुने विश्वास व्यक्त गरे । हवाई सेवाका लागि आफ्नो प्रदेशले प्रक्रिया सुरु गरिसकेको जानकारी गराउदै गण्डकी प्रदेशको यसमा सहयोग भएमा हवाई सेवा चाडै सञ्चालनमा आउने समेत उनको भनाई थियो ।

सगरमाथा, पाथीभरा, हलेसी लगायतका क्षेत्र आफ्नो प्रदेशको पर्यटकीय क्षेत्रहरु भएको बताउदै यी गन्तव्यमा घुम्न आउन समेत गण्डकी प्रदेशवासीलाई उनले आग्रह गरे ।गण्डकी प्रदेशका उद्योग, पर्यटन, वन तथा बाताबरण मन्त्री विकास लम्सालले आफुहरु पनि पोखरा विराटनगर हवाई सेवा सुरुवात होस भन्ने पक्षमा रहेको बताए । यसका लागि प्रक्रिया चाडै अगाडि बढ्ने बताउदै यसबाट पर्यटन आगमनमा थप सहज हुने विश्वास व्यक्त गरे । उनले आन्तरिक पर्यटकको स्वागतका लागि गण्डकी प्रदेशका् गतव्यहरु तयार रहेको सन्देश दिनका लागि यो कार्यक्रम सञ्चालन गरिएको बताउदै सवैलाई प्रदेशमा भ्रमणमा आउन आग्रह गरे ।कार्यक्रममा बोल्दे विराटनगरका व्यावसायीहरुले समेत पोखरा विराटनगर सिधा हवाई सेवाले पर्यटनमा सकरात्मक प्रभाव पार्ने बताएका थिए ।

पोखरा, असोज ६ । कम्प्युटर एसोसिएसन नेपाल (क्यान) महासंघ नेपालको गण्डकी प्रदेशको उपाध्यक्ष र कोषाध्यक्षमा पोखराका युवा व्यवसायी नविन पौडेल र राजेन्द्र तिवारी निर्वा्चित भएका छन् ।

हालै सम्पन्न क्यान महासंघ गण्डकीको दोस्रो अधिवेशनबाट पौडेल उपाध्यक्ष र तिवारी कोषाध्यक्ष निर्वा्चित भएका हुन् । सदस्यमा भएको निर्वाचनमा तिवारी र पौडेलको सबैभन्दा बढी मत समेत आएको थियो ।

अध्यक्षमा तुलसीराम पाण्डे निर्वा्चित हुँदा सचिवमा केशवराज भट्टराई निर्वा्चित भए । सहसचिवमा शिशुबाबु प्रधान निर्वा्चित भएका छन् । निवर्तमान अध्यक्ष चिन्तामणि बास्तोला पदेन सदस्य रहनेछन् । प्रदेश अन्तर्गतका सम्पूर्ण जिल्ला अध्यक्षहरु पदेन सदस्य रहनेछन् ।

असोज ६ , पोखरा ।गण्डकी प्रदेशका सांसद एवं अर्थ तथा विकास समितिका सभापति दीपक कोइराला (रुपक)ले खानेपानी योजनाको लागि बजेटको अभाव नहुने बताउनु भएको छ । आज पोखरा महानगर वडानं ३२ चैनपूर सातमुहाने खानेपानी उपभोक्ता समूहको १८औं वार्षिक साधारण सभाको उद्घाटन गर्दे सभापति कोइरालाले सो कुरा बताउनु भएको हो । उहाँले कम्युनिष्ट सरकारले सवै जनतालाई स्वच्छ पानी खाने बातावण बनाउने बताउनु भयो ।

एक घर एक धारा अभियान संचालन भइरहेको भन्दै गण्डकी प्रदेश सरकारले खानेपानीको क्षेत्रमा प्राथामिकतामा पारेर कार्य गरीरहेको उहाँको भनाई थियोे । चैनपूर सातमुहाने खानेपानी मर्मतको लागि प्रदेश सरकारले ४८ लाखको बजेट विनीयोजन गरेको जानकारी दिदै कोइरालाले धाराबाट थापेर सिधै पानी खाने गरि शुद्ध पानी वितरण हुनु पर्ने बताउनु भयो ।

उहाँले पानी शुद्धिकरणको लागि योजना लिएर आउन स्थानीयलाई आग्रह गर्नुभएको हो । योजना बनाएर आउनुस बजेटको अभाव हुने छैन कोइरालाले भन्नु भयो ।सोही क्षेत्रका प्रदेश सांसद कोइरालाले कुनैपनि योजनाहरु सफलहुनको लागि स्थानीयहरुको चासो र साथ हुनुपर्नेमा जोड दिनु भयो ।

कार्यक्रममा बोल्दै नेकपाका नेता टिकाराम पंगेनीले २०५७ सालबाट शुरु भएको ढकाल खोला मुल बाट शुरु भएको योजनामा अहिले पाँच सय घर धुरी रहेको बताउनु भयो ।वडानं ३२का वडा सदस्य विष्णु तिवारीले सवैको लागि पानी महत्वपुर्ण हुने भन्दै मान्छेलाई पानीकै कराण ८० प्रतिशत रोग लाग्ने गर्ने गरेको बताउनु भयो । वडाले पनि पानीको लागि प्राथामिकतामा राख्दै आएको बताउनु भयो

कार्यक्रम चैनपूर सातमुहाने खानेपानी उपभोक्ता समूहका अध्यक्ष लक्ष्मीकान्त सापकोटाको अध्यक्षतामा भएको थियो ।

लेखनाथ, ६ असोज ।पोखरा महानगरपालिका तालचोकस्थित डायमण्ड माविले यहि असोज ११ गते विद्यालय प्राङ्गणमा दोस्रो पढाइ महोत्सव गर्ने भएको छ । विद्यार्थीको पढाइमा अभिरुचि बढाउनुका साथै पढ्ने कलाको विकाश गर्ने उद्देश्यले पढाइ महोत्सवलाई यस वर्ष पनि आयोजना गरिएको हो । साना वालबालिकाको शैक्षिक विकाशमा थप सहयोग पुगोस् भन्ने महोत्सवको मुख्य उद्देश्य रहेको विद्यालयका व्यवस्थापक हरि लामिछानेले बताएका छन् ।

नेपाली तथा अंगे्रजी दुवै विधामा विद्यार्थीहरुले कथा, प्रबन्ध, कविता, तहगत रुपमा अक्षर, शब्द, वाक्य, निवेदन, चिठी, संवाद, चित्रकथा, सूचना, बधाई पत्र, समबेदना पत्र, विज्ञापन आदिको नमुना वाचन प्रस्तुत गर्ने कार्यक्रम रहेको विद्यालयका प्राचार्य यमवहादुर रोकाले बताएका छन् ।

बावुनानीको सर्वाङ्गीण विकाशका लागि घर र विद्यालयको वातावरण सिकाइ अनुकुल हुनुपर्ने बताउँदै विद्यालयका निर्देशक माधवशरण उपाध्यायले महोत्सवलाई भव्य र प्रभावकारी बनाउन विद्यालय प्रशासन तीव्र तयारीमा लागेको जानकारी दिएका छन् ।

पोखरा, असोज ६ । पोखराको पृथ्वीचोकमा नयाँ मल संचालनमा आएको छ । ‘कुन्ती मल’ नाम दिएर यसका संचालकहरुले ‘मल’ संचालनमा ल्याएका हुन् । त्यसो त यो मल संचालनमा आएको २०४७ सालदेखि नै हो । तर तत्कालिन समयमा एक तलाको भवनमा सामान्य सटरहरुमा मात्रै यहाँ व्यवसाय गरिन्थ्यो । अहिले यो मलमा दुईवटा तल्ला थप व्यवस्थित तरिकाले संचालनमा ल्याईएको छ । करिब १२ करोड रुपैयाँ लगानी यो मलमा थप गरिएको यसका संचालक निरञ्जन वजिमयले जानकारी दिए ।

‘पोखरामा व्यवस्थित शपिङ गर्ने थलो निर्माण गर्नुपर्छ भन्ने मान्यतासहित २०४७ सालमै हामीले यहाँ सटरहरु निकालेका थियौँ । र, लामो समय सोही संरचनामा यहाँ व्यवसाय संचालनमा आएका थिए । यद्यपि समय अनुसार अपडेट आवश्यक छ भन्ने ठानेर नै हामीले यसलाई अझै ब्यवस्थित बनाएका हौँ ।’ सोमबार मलको शुभारम्भ सम्बन्धमा आयोजित पत्रकार सम्मेलनमा वजिमयले भने ।

पौने तीन रोपनी क्षेत्रफलमा निर्माण भएको यो मलमा हाल १ सय २६ वटा सटरहरुमा व्यवसायीहरुले व्यवसाय गरिरहेका छन् । सबै सटरहरुलाई १ सय ६० वर्गफिटमा बाँडिएको छ । र, ग्राहकहरुलाई हिँडडुलका लागि सजिलो होस् भन्ने हेतुले यहाँ प्रशस्तै खाली ठाउँ पनि छाडिएको छ । त्यो सँगै यहाँ किनमेलका लागि आउने ग्राहकहरुको सजिलोका लागि मल व्यवस्थापनले पार्किङको व्यवस्था पनि गरेको छ ।

‘मल भित्र छिरिसकेपछि ग्राहकहरुलाई इन्गेज गराउन त्यहाँको वातावरणले पनि महत्वपूर्ण भुमिका खेल्छ । र, हामीले मललाई अत्याधिक ग्राहकमैत्री बनाएका छौँ । जसले गर्दा यहाँ निर्धक्क भएर ग्राहकहरुले किनमेल गर्न सक्छन् ।’ मलका अर्का संचालक विवेक गुरुङले भने–‘त्यो बाहेक हामीले यहाँको व्यवसायीलाई पनि प्रमोट गर्छौँ । यहाँ व्यवसाय गर्नेले पुस्तौँसम्म सोही स्थानबाटै व्यवसाय गरिरहोस् भन्ने मानसिकताका साथ व्यवस्थापनले काम गरिरहेको छ ।’

मलमा हाल डिपार्टमेन्टल स्टोर, गहना पसल, रेस्टुरेन्ट, ट्राभल एजेन्सी, फेन्सी पसलहरु, कस्मेटिक र जुत्ता पसल, सैलुन लगाएतका सुविधा छन् । र, अझै केही भिन्न शैलीका पसलहरु थपिने क्रममा रहेको मल व्यवस्थापनले जनाएको छ ।

व्यवस्थापनले ‘मल’को आधिकारिक शुभारम्भ १२ गते गर्ने जनाएको छ । र, सोही अवसरमा विशेष कार्यक्रमहरु पनि मल परिसरमा हुने बताएको छ । ‘दशैँसँगै मलको शुभारम्भको अवसर पारेर हामीले विशेष साँगीतिक माहौल यहाँ तयार गर्दैछौँ । र, यो असोजको १२ देखि १३ गतेसम्म हुनेछ ।’ मल शुभारम्भ विशेष कार्यक्रमका सँयोजक रहेका विवेक गुरुङले भने–‘यहाँ आउने हरेकजनाले विशेष मनोरञ्जन प्याकेज त्यो बेलामा पाउनुहुनेछ ।’

दुई दिने विशेष साँगीतिक कार्यक्रममा भाइरल बाबा, परमिता राणा, छेवाङ लामा, सुजन जिम्बा, क्रिष्टल क्लज डान्स क्रु, बि टु डी, लक्ष्य ब्याण्ड, कमेडीतन्त्र, ब्ल्याक शिप ब्याण्ड, टिकटक क्विन अमिता गुरुङ, रोडिजका प्रतिस्पर्धी अनिमेश शाही लगाएतको प्रस्तुती रहने मल व्यवस्थापनले जनाएको छ ।

पोखरा, ६ असोज । संसदीय गतिविधि सर्वसाधारणका लागि खुला हुनुपर्नेमा जोड दिइएको छ । फ्रिडम फोरमले पोखरामा आयोजना गरेको खुला संसद अवधारणा र अभ्यास विषयमा भएको छलफल कार्यक्रममा बोल्ने वक्ताहरुले सो कुरामा जोड दिएका हुन् । सहभागीहरुले नागरिक समाजको निगरानी कम हुनु र सञ्चार माध्यमले विश्लेषणयुक्त समाचारलाई स्थान नदिनु चिन्ताको विषय भएको उल्लेख गरे । उनीहरुले संसदमा भएका गतिविधि, सांसदको कुरा, कानुन लगायतका विषय जनतासामु ल्याउन गण्डकी प्रदेश सभा थप क्रियाशिल हुनुपर्नेमा जोड दिए ।

गण्डकी प्रदेशका सभामुख नेत्रनाथ अधिकारीले प्रदेशमा संसदीय अभ्यास शुरु भएको धेरै समय नभएको बताउदै पारदर्शी बनाउन लागिपरेको उल्लेख गरे । उनले यसअघि नै स्थापित पूर्वाधारमा बसेर संसद चलाएको बताउदै आगामी दिनमा जनताकोबीचमा जाने गरी पूर्वाधार र प्राविधिक पक्षलाई जोड दिएको प्रष्ट पारे । ‘हाम्रो कामलाई पारदर्शी बनाउनुपर्छ । जनताले थाहा पाउनुपर्छ भन्ने मेरो मान्यता छ, उनले थपे, ‘यस कार्यमा सबैको साथ आवश्यक छ ।’

प्रदेश सभा सदस्य पुष्पा केसी भण्डारीले खुला संसदको विषयमा संसदमै छलफल हुनुपर्नेमा जोड दिईन् । उनले संसदले गर्ने कामवार्हीबारे सञ्चारजगतले प्रभावकारी ढंगले बाहिर ल्याउनुपर्ने बताईन् । फ्रिडम फोरमका संस्थापक अध्यक्ष तारानाथ दाहालले संसदको प्रभावकारिता वृद्धि गर्न खुला संसदको सोचाईलाई देशव्यापी छलफल अघि बढाउन खोजेको प्रष्ट पारे । जनताको गुनासो सुन्ने निकाय संसद नै भएको बताउदै यसलाई विश्वासीलो बनाउन सरकार र राजनितिक पार्टी लाग्नुपर्ने उनको भनाई थियो । ‘संसदको भूमिका सक्रिय हुन सकेको खण्डमा प्रजातान्त्रिक प्रक्रिया बलियो हुन्छ,’ उनले अगाडी थपे, ‘संसदप्रति जनताको विश्वास घटेमा प्रणालि नै कमजोर हुँदै जान्छ ।’

नेपाल उद्योग वाणिज्य महासंघका पूर्व अध्यक्ष आनन्दराज मुल्मीले राजनीतिक दलले प्रजातान्त्रिक अभ्यास गर्नुपर्ने उल्लेख गरे । उनले प्रदेश सभामा आएका विधेयकहरु व्यापक छलफल गरि अगा८ िबढाउनुपर्नेमा जोड दिए । ‘अहिलेसम्म आएका विधेयकबारे छलफल नै भएको छैन । प्रदेश सभाको क्षमतामाथि नै प्रश्न उठेको छ,’ उनले अगाडी भने, काम नपाएर प्रदेश सभाले काम गर्न सकेको छैन । यसमा सभामुखको भूमिका हुनुपर्छ ।’

उच्च अदालत, पोखरा बारका अध्यक्ष रोहितराज बास्तोलाले विज्ञहरुको ज्ञानलाई राज्यले उपयोग गर्नुपर्ने उल्लेख गरे । भद्रकाली क्याम्पसका प्राध्यापक किशोरदत्त बरालले गहिरो अध्ययन नगरि बनेका कानुनको कार्यान्वयन पक्ष फितलो हुने बताए । अग्रज पत्रकार नारायण कार्कीले सुचना लुकाउन परम्परा कायमै रहेको टिप्पणी गरे । गण्डकी प्रदेश सभाका निमित्त सचिव हरि प्रसाद बास्तोलाले संसदीय गतिविधि प्रत्यक्ष प्रसारणका लागि प्रयास गरिरहेको जानकारी दिए । कर्णाली, सूदुरपश्चिम, ५ नं. प्रदेशमा यो छलफल भईसकेको फोरमले जनाएको छ । संसद सहयोग परियोजना

यूएनडिपीको सहयोगमा सो कार्यक्रम भएको हो । कार्यक्रममा नागरिक समाज, संसदीय पत्रकार, सम्पादक, गैर सरकारी संस्थाकाका प्रतिनिधीहरुको सहभागिता रहेको थियो ।
तस्विर पनि छ ।

पोखरा, असोज ६ । गण्डकी प्रदेशकै ठुलो शक्तिपीठ बिन्ध्यबासिनी मन्दिरमा नवदुर्गा महोत्सब–२०७६ आयोजना हुने भएको छ । बिन्ध्यबासिनी धार्मिक क्षेत्र बिकास समितिको अयोजनामा आगामी १२ गते (घटस्थापना) देखी असोज २० गते नवमी सम्म नवदुर्गा महोत्सब आयोजना हुने सोमबार पत्रकार सम्मेलनको आयोजना गरी जानकारी दिईएको हो ।

समितिका सचिब तीर्थ श्रेष्ठले सो महोत्बसको शुभारम्भ शोभायात्रा मार्फत गरिने बताए । उनले नवकन्या आरुढ नौ रथ, बिन्ध्यवासिनी मन्दिरको झाँकी, नेपाली सेना, नेपाल प्रहरी, सशस्त्र प्रहरी, नेपाल स्काउट, राष्ट्रिय सेवा दल, बटुकहरु, जलकलश सहित मातृशक्ति, बिभिन्न आमा समुहहरु, सामाजिक धार्मिक तथा जातिय साँस्कृतिक बैंक तथा बित्तिय संस्थाहरु, शैक्षिक संस्थाहरु, भजन समुहहरु र वाणिज्य तथा बस्तुगत सँघहरुको उपस्थितिमा शोभायात्रा गर्दै महोत्सब सुरु गरिने बताए । उनले महोत्सब अवधिभर रात्रिकालिन आरती समेत गरिने बताए ।

नवमीसम्म सञ्चालन हुने सो महोत्सबमा युवा पण्डित नारायण देवकोटाले संगीतमय झाँकी सहित श्रीमद्देवी भागवतको कथा प्रस्तुत गर्ने बताए । श्रेष्ठका अनुसार प्रत्येक दिन बिहान ९ देखी १२ बजे सम्म र मध्यान्नदेखी अपरान्ह ४ बजे सम्म महायज्ञ हुनेछ । उनले बिजयादशमीको दिन बिहान ४ बजेतदेखी नित्य पूजा आरम्भ र्भई ५ बजेबाट भक्तजनहरुका लागि खुला गरिने श्रेष्ठले बताए । त्यसपश्चात वाल गोपाल भजन मण्डल तथा बिन्ध्यबासिनी महिला भजन समुहबाट भजन कीर्तन हुने आयोजकले जनाएको छ ।

धरान, असोज ६ । पश्चिमाञ्चल होटल संघ पोखराले सोमबार सुनसरी जिल्लाको धरानमा सोमबार एक पत्रकार सम्मेलनको अयोजना गरी त्यहाँका बासिन्दालाई पोखरा भ्रमणको निम्ता प्रदान गरेको छ । बर्खा यामको समापन सँगै चाडवाडको मौसम सुरु भएको र पोखरा नजिक हिमालहरु प्नि प्रष्टसँग खुल्ने याम सुरु भएको स्मरण गराउँदै संघका अध्यक्ष विकल तुलाचनले धरानवासीलाई भ्रमणको लागि आग्रह गरेका हुन् ।

गण्डकी प्रदेश सरकारले अहिले आन्तरिक पर्यटन बर्ष २०१९ समेत मनाइरहेको स्मरण गराउँदै अध्यक्ष तुलाचनले यही अवसरमा पोखरा घुम्न धरानबासीलाई आग्रह गरे । भौगोलिक र सांस्कृतिक रुपमा समेत पोखरा र धरान बिच धेरै समानता भएको भन्दै पोखरा घुम्न आउने आन्तरिक पर्यटकलाई विभिन्न छुटका प्याकेजहरु समेत व्यवस्था गरिएको जानकारी तुलाचनले सो अवसरमा गराए ।

पोखरामा सामान्यस्तरदेखि पाँचतारे होटलहरुको सुुविधा उपलब्ध रहेको भन्दै तुलाचनले पर्यटकले आफ्नो आर्थिक हैसियत अनुसार होटलमा बस्ने, खाने र घुमघामका प्याकेज किन्न सक्ने भनाई राखे । पोखराका होटलमा ३० हजार भन्दा बढी विस्तारा रहेको र मनग्य रेष्टुराँहरु समेत भएको भन्दै उनले पोखरा पुग्ने पर्यटकका लागि बस्न र खानको कुनै समस्या नहुने बताए ।

संघले आन्तरिक पर्यटन प्रबद्र्धनका लागि जाउँ है पोखरा, भारतीय पर्यटकका लागि चलिय पोखरा र तेश्रो मुलुकहरुमा समेत पर्यटन प्रबद्र्धन अभियान संचालन गर्दै आएको स्मरण तुलाचनले गराए । भारतीय प्रधानमन्त्री नरेन्द्र मोदीले पछिल्लोपटक मुक्तिनाथको भ्रमण गरेपछि पोखरा र वरपर भारतीय पर्यटक आगमनमा समेत बढोत्तरी आएको उनले जानकारी गराए । सोही अवसरमा तुलाचनले पर्यटनको विकासका लागि पूर्वाधारको विकास पनि उत्तिकै महत्वपूर्ण हुने भन्दै यस विषयमा सरकार गंभीर बन्नुपर्ने सुझाव राखे ।

सो अवसरमा बोल्दै होटल एसोसिएशन धरानका अध्यक्ष सरोज भट्टराईले संघले संचालन गरेको जाउँ है पोखरा अभियान सराहनीय भएको भन्दै पर्यटनमा सहकार्य गरेर अगाडि बढ्न आफूहरु तयार रहेको भनाई राखे । धरान र वरपर थुप्रै पर्यटकीय गन्तव्यहरु भएको भन्दै ती क्षेत्रको भ्रमण गर्न पोखरेलीसँग उनले आग्रह गरे ।

नेपाल पर्यटन बोर्डको आयोजना तथा धरान उपमहानगरपालिकाको समन्वयमा धरानमा आयोजित तीन दिने दोश्रो इष्ट टुरिजम मार्ट २०१९ मा भाग लिन पश्चिमाञ्चल होटल संघ पोखराको एक टोली धरान पुगेको थियो । सोही अवसरमा होटल संघले पत्रकार सम्मेलनको आयोजना गरेको हो ।

पर्यटन मार्टमा पोखरेली होटलकर्मीहरु द्विपक्षीय ब्यापारिक भेटघाटमा सहभागी भएका थिए । सो मार्टमा नेपालका सातै प्रदेशका पर्यटन व्यवसायी, भारत, बंगलादेश, भुटान लगायतका देशका पर्यटन व्यवसायी समेत सहभागी भएका थिए । मार्टमा पोखरेली व्यवसायीले पोखरा र वरपरका पर्यटकीय गन्तव्य तथा उपलब्ध सेवा सुविधाका बारेमा समेत जानकारी गराएका थिए । पोखरा सम्बन्धि प्रचार सामग्रीको वितरण र पर्यटकीय प्याकेजहरुका बारेमा जानकारी समेत सो अवसरमा गराइएको थियो ।

कार्यक्रममा होटल एशोसिएशन धरानका पुर्व अध्यक्ष प्रमेश श्रेष्ठको पनि उपस्थिति रहेको थियो । पत्रकार सम्मेलनको संचालन संघका उपाध्यक्ष लक्ष्मण सुबेदीले गरेका थिए ।

पोखरा, असोज ६ । पोखरा भलिबल प्रशिक्षण केन्द्रले नदीपुरमा आयोजना गर्ने तेस्रो संस्करणको क्लब स्तरीय पुरुष, महिला तथा भेट्रान्स भलिबल प्रतियोगिताको सम्पूर्ण तयारी पुरा भएको छ । ‘स्वास्थ्यका लागि खेलकुद, खेलाडी राष्ट्रका गौरब’ भन्ने नाराका साथ आगामी ८ देखी ११ गते सम्म पोखराको नदिपुर स्थित छन्त्याल समाजको खेल मैदानमा आयोजना हुने प्रतियोगिताका तयारी पुरा भएको सोमबार आयोजित पत्रकार सम्मेलन मार्फत जानकारी दिईएको हो ।

प्रतियोगिताको खेल संयोजक अनिल गुरुङले पुरुष तर्फको बिजेता टिमलाई शिल्ड, मेडल तथा प्रमाणपत्र सहित नगद रु ५५ हजार ५ सय ५५ प्रदान गरिने बताए । उनका अनुसार उपबिजेता टिमले शिल्ड, मेडल तथा प्रमाणपत्र सहित नगद रु ३३ हजार ५ सय ५५ प्राप्त गर्नेछ । त्यसैगरी महिला तर्फको बिजेता र उपबिजेता टिमलाई क्रमश शिल्ड, मेडल तथा प्रमाणपत्र सहित नगद रु २० र १३ हजार प्रदान गरिने बताए ।

उनका अनुसार भेट्रान्स तर्फको बिजेता टिमले शिल्ड, मेडल तथा प्रमाणपत्र सहित नगद रु खसी हजार र उपबिजेता टिमले नगद रु खसी हजार प्राप्त गर्नेछ । संयोजक गुरुङले प्रतियोगिताबाट उत्कृष्ट खेलाडी तथा बिद्यागत रुपमा (उत्कृष्ट स्पाइकर, ब्लकर, सेटर, क्वीकर, सर्भर, डिफेण्डर र उदीयमान खेलाडी) पुरस्कृत गरिने जानकारी दिदै पुरुष तर्फ दर्ता शुल्क रु ४ हजार ५ सय र महिला तर्फ २ हजार ५ सय तथा भेट्रान्स तर्फ ३ हजार निर्धारण गरिएको बताए ।

पत्रकार सम्मेलनमा बोल्दै प्रशिक्षण केन्द्रका अध्यक्ष मनोज खड्काले उक्त प्रतियोगिताबाट टिकट तर्फ संकलित शत प्रतिशत रकम मृगौला पिडित सुरज गुरुङलाई मुगौला प्रत्यारोपणका लािग सहयोग गरिने बताउदै पहिलो दिनको टिकट दर ५० र समापन समारोह (फाईनल खेल) मा १०० रुपैया निर्धारण गरिएको बताए ।

लम्जुङ बेशीशहर घर भई हाल पोखरा १२ निवासी मृगौला पिडित गुरुङको उपचार ललितपुर स्थित किष्ट मेडिकल टिचिङ अस्पतालमा भैरहेको अध्यक्ष खड्काले जानकारी दिए ।